Kino va telemahsulotlarni tayyorlashda yorug‘lik filtrlaridan juda keng foydalaniladi. Yorug‘lik filtrlari plyonka, shisha va qattiq plastik ko‘rinishlarda bo‘lishi mumkin. Qo‘llanilish sohasiga ko‘ra esa ular quyidagi guruhlarga bo‘linadi: konversion (kompensatsion), ND (neytral-kulrang), rangli filtrlar.

Zamonaviy yorug‘lik filtrlari ishlab chiqaruvchilar sirasiga Formatt, Lee, Rosco, Strand Lighting, Cris James kabi firmalar kiradi. Ular ayni bir standart ostida yorug‘lik filtrlarini ishlab chiqaradilar.

Konversion (kompensatsion) filtrlar. Bu turdagi filtrlar yorug‘likning spektral tuzilishini o‘zgartiradi, ya’ni rang xaroratiga ta’sir etadi.

Ko‘p xollarda pavilonlarda, xona ichida yoki tabiiy muhitda tasvirga tushirish jarayonlarida rang xarorati bilan bog‘liq muammolarni bartaraf etishda foydalaniladi. Ushbu filtrlar yordamida bir qiymatdagi rang xaroratiga erishiladi.

Konversion filtrlarning rang xaroratiga ta’sir etuvchi ikkita asosiy xili mavjud:

• ko‘k (CTB — Color Temperature Blue)
• to‘q sariq (CTO – Color Temperature Orang).

Ko‘k konversion filtrlar (CTB) to‘q sariq filtrlarga nisbatan yorug‘lik spektridagi qisqa to‘lqinlarni yaxshiroq o‘tkazadi va shuning uchun yorug‘lik tarkibidagi ko‘k rang miqdori ko‘payadi, natijada rang xaroratining oshishiga erishiladi.

Rang xaroratini tushirish uchun CTO konversion filtrlaridan foydalaniladi, bu filtrlar yorug‘lik tarkibidagi to‘qsariq-qizil diapazondagi to‘lqinlarni yaxshi o‘tkazadi.